Vishesh Jaimala - Asha Bhosle-1

Written by Sujoy Chatterjee
Radio Se
Print

Mere Pyare Fauji Bhaiyon Ko Asha Ka Namaskaar. Aapko Namaskaar Kehna Aapki Tauheen Hogi. Na Jaane Aap Kahaan Kahan Baithe Honge, Barf Par, Sarhadon Par, Aur Hamari Raksha Kar Rahe Honge. Aap Ko To Jhuk Kar Pranaam Karna Chaahiye. Aaj Aap Mere Pasand Ke Kuchh Gaane Sunnewale Hain. Lekin Usse Pehle Jo Samar Mein Amar Ho Gaye Hain, Jinhone Is Desh Ki Khaatir Apni Zindegi Arpan Kar Dee Hai, Unke Liye Ek Shraddha Geet Gaana Chaahti Hoon.

Asha Sings: Jo Samar Mein Ho Gaye Amar

Koi Koi Kshan Zindegi Ke Aise Hote Hain Jo Bhoolaaye Naheen Jaa Sakte, Bade Mazedaar Hote Hain. Mera Ladka Hemant, Aap Samajhte Honge Maa Ke Liye Beta Kya Cheez Hota Hai, Ek Din Woh Music Director Ban Gaya Aur Mere Paas Aakar Kehne Laga Ki Yeh Mera Gaana Hai, Tum Gaayo. Kaisa Lagta Hai Na? Jo Kal Tak Itna Sa Tha, Aaj Woh Mujhse Keh Raha Hai Ki Mera Gaana Gaap. Phir Usne Apni Behan, Meri Beti Varsha Se Kehne Lagaa Ki Tumhe Bhi Gaana Padega. Varsha Bahut Shrmilee Hai, Usne Kaha Ki Badi Maasi Itna Achchha Gaati Hai, Maa Itna Achchha Gaati Hai, Main Naheen Gaayungi. Lekin Hemant Ne Bahut Samjhaya Aur Uska Pehla Gaana Record Huya. Main Studio Pahunchi To Dekha Ki Ladki Mike Ke Saamne Khadi Hai Aur Uska Bhai 1,2 Bol Raha Hai. Yeh Kshan Main Kabhi Naheen Bhool Sakti. Yeh Gaana Suniye Usi Film Jadoo Tona Ka.

Song: Yeh Gaon Pyara Pyara (Jadoo Tona)

(*** The Above Song Is Sung By Varsha Bhosle & Composed By Hemant Bhosle)

Jiski Madhur Awaaz Se Auron Ka To Pataa Naheen, Meri Dhadkan Ruk Jaati Hai, Aapko Pataa Chal Hi Gaya Hoga Ki Main Kiski Baat Kar Rahi Hoon, Jee Haan, Meri Badi Bahen, Lata Didi Ka. Jaise Woh Studio Mein Kadam Rakhti Hain, Sab Tham Sa Jaata Hai, Wahaan Maujood Log Khade Hokar Unhe Pranaam Karte Hain. Safed Saree Mein Mike Ke Saamne Khadi Hokar Jab Woh Gaati Hai, Bahut Hi Achchha Lagta Hai. Ek Baar Unke Saath Mera Ek Duet Gaana Record Hone Jaa Raha Tha. Jaise Hi Did Ne Alaap Shuru Kiya, Mujhe Aisa Laga Ki Main Gaana Bhool Gayi.

Asha Hums The Alaap Of "Mann Kyun Behka"

Song: Mann Kyun Behka Ri Behka (Utsav)

Main Hamesha Yeh Kehti Hoon Ki Playback Singing Itna Aasaan Naheen Hai. Iske Liye Classical Seekhna Bahut Zaroori Hai. Naheen To Awaaz Baad Mein Utni Achchhi Nahenn Rehti, Pehle Pehle Achchha Lagta Hai. Iske Misaal Hain Suresh Wadekar, Jo 6 Saal Ki Umra Se Classical Seekh Raha Hai. Aap Sunenge Abhi Uski Awaaz Kitni Achchhi Hai, Kitni Sureeli Hai.

Song: Bin Payal Ke Chham Chham Karti (Sawerewali Gaadi)

Har Maa Apne Bachche Ko Yeh Kehkar Daraati Hai Ki Police Wala Aa Jayega, Militarywala Aa Jaayega. 1942 Ki Baat Hai Jab Hum Poona Mein Rehte The. Un Dino Militarywalon Ki Bahut Gaadiyaan Jaaya Karti Thi, Hum Dar Jaaya Karte The. Ek Baar Kya Huya Ki Hum Sab Bhai Behne Kashmir Ghoomne Gaye The, Didi Naheen Gayi Thi, Main, Usha, Meena, Hridaynath Aur Hemant. Ek Din Usha Ko Bukhaar Aa Gaya, Bahut Beemaar Ho Gayi. Main Sabse Badi Thee, Raat Ka Waqt Tha, Kuchh Samajh Mein Naheen Aa Raha Tha Ki Kya Karoon, Kiske Paas Jaayun. Raste Mein Nikalne Ke Baad Mujhe Ek Military Camp Nazar Aayi Aur Main Seedhe Wahaan Chali Gayi. Ek Militarywale Ne Bade Rookhe Andaaz Mein Poochha "Kya Chaahiye, Kyun Aayi Hain Yahaan?" Main To Dar Gayi, Phir Boli Apni Baat. Un Logon Ne Phir Doctor Ka Intezaam Kiya, 3 Dino Tak Lagaataar Usha Ki Seva Kee. Jab Usha Theek Ho Gayi To Maine Un Logon Se Kaha Ki Hum Aapse Dar Rahe The. Unhone Kaha Ki Aapki Seva Karna Yahi Hamara Dharm Hai. Tab Se Fauji Bhaiyon Ke Liye Mujhe Bahut Pyar Aa Gaya.

Song: Pehle Pehle Pyar Ki (Jawani)

Ek Din Mujhse Kaha Gaya Ki Aapko Ek Record Karna Hai Pakistan Ke Mashoor Fankaar Ghulam Ali Ke Saath. Main Ekdum Se Chup Ho Gayi. 15 Dino Ke Andar 8 Gaane Record Karne The. Meri Beti Varsha Ne Kaha Ki Aai, Marathi Mein Maa Ko Aai Kehte Hain, Usne Kaha Ki Aai, Tu Zaroor Yeh Gaana Gaayegi, Ho Jaayega. Uski Baat Sunkar Main Jab Gaane Gayi To Paaya Ki Waqai Yeh Bahut Mushkil Hai, Par Sab Thikthaak Se Ho Gaya. Usi Record Mein Se Meri Pasand Ka Ek Gaana Suniye "Dil Dhadakne Ka Sabab Yaad Aaya".

Song: Dil Dhadakne Ka Sabab Yaad Aaya (Non-Film Ghazal)

Yeh Bahut Puraani Baat Hai, Film Armaan Mein S D Burman, Yaani Dada Ke Liye Main Gaa Rahi Thi. Recording Room Mein Ek Jawaan Ladka Aaya. Burman Dada Ne Kaha Ki Asha, Yeh Mera Ladka Hai. Maine Kaha Namasteji, Kaise Hain Aap? Unhone Mujhse Autograph Liya Aur Chale Gaye. Phir Kuchh Dino Ke Baad Humari Mulaqaat Huyi, Dada Ne Kaha Ki Pancham, Asha Ko Zara Gaana Seekha. Uske Baad Unke Liye Gaate Gaate Mujhe Kya Pataa Tha Ki Unke Liye Khaana Bhi Pakaana Padega Aur Unka Ghar Bhi Sambhaalna Padega! Film Teesri Manzil Ke Baad Mujhe Pata Chala Ki Woh Kitna Achchha Music Director Hain. Is Film Ka "Aaj Aaja Main Hoon Pyar Tera" Ke Liye Mujhe 3 Takes Dene Pade. "O Mere Sona Re" Aaj Bhi Log Khoob Pasand Karte Hain. Unka Yeh Gaana Suniye.

Song: Duniya Maane Bura To Goli Maaro (Arjun)

Fauji Bhaiyon, Gaane Hazaaron Hai, Aur Time Kam Hai. Main Apni Pasand Ke Sab Ke Sab Gaane To Naheen Suna Sakti, Roshan Sahab Ka Ek Ek Geet Sunwana Chahungi Jo Mujhe Bahut Pasand Hai, Jo Classical Hai, Aur Jise Maine Chhoti Bahen Usha Ke Saath Gaaya Hai.

Song: Kaahe Tarsaaye Jiyara (Chitralekha)

Mahaan Deshbhakt Ram Prasad Bismil Ka Likha Yeh Geet...

Asha Sings: Sarfaroshi Ki Tamanna Ab Hamare Dil Mein Hai

Ab Main Aap Se Ijaazat Maangti Hoon, Jai Hind

THE END

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Asha Bhosle-1
| + - | RTL - LTR