Vishesh Jaimala - Asha Bhosle-2

Written by Sujoy Chatterjee
Radio Se
Print

Mere Pyare Fauji Bhaiyon Ko Asha Ka Namaskaar. Aapko Namaskaar Kehna Aapki Tauheen Hogi. Na Jaane Aap Kahaan Kahan Baithe Honge, Barf Par, Sarhadon Par, Aur Hamari Raksha Kar Rahe Honge. Aap Ko To Jhuk Kar Pranaam Karna Chaahiye. Aaj Aap Mere Pasand Ke Kuchh Gaane Sunnewale Hain. Asha Hai Aapko Yeh Gaane Pasand Aayenge. To Suniye Mere Pasand Ka Pehla Geet.

Song: Panchhi Ko Jaana Hai Panchhi Ud Jaayenge (Paise Ki Gudiya)

Yeh Jo Buland Aawaaz Aap Sun Rahe Hain, Aisi Aawaaz Bhagwaan Hazaar Saalon Mein Ek Baar Paidaa Karti Hai. Is Aawaaz Ki Gehraai Aur Oonchaai Ka Kya Kehna. Main Rafi Saahab Ko Kaha Karti Thi Ki Aap Jab Tak Chaahen Gaate Rahenge. Aap Yeh Geet Suniye Jo Mujhe Bahut Pasand Hai, "Panchhi Ko Jaana Hai Panchhi Ud Jaayenge". Kise Pataa Tha Ki Yeh Panchhi Itni Jaldi Hamein Chhod Kar Ud Jaayegaa.

The Song "Panchhi Ko Jaana Hai Panchhi Ud Jaayenge" Continues.

Aap Ko Ek Baat Bataayun, Jab Main 15 Saal Ki Thi, Tabhi Hemant Mere God Mein Aa Gaya Tha Aur Woh Mujhe Apni Badi Bahen Se Zyaada Kuchh Bhi Naheen Maanta Tha. Har Baat Mein Zid Karta, Kabhi Khaane Mein Zid To Kabhi Sone Mein Zid. Ek Baar Maine Usey 'Bathroom' Mein Band Kar Diya To Woh Paani Bhar Bhar Kar Darwaaze Se Baahar Phenkne Lagaa Aur Poora Ghar Paani Se Bharne Lagaa. Aisa Natkhat Tha Mera Hemant. Baad Mein Sangeetkaar Banne Ke Baad Jab Maine Uska Banaaya Huya Film Shraddhanjali Ka Yeh Geet Gaane Lagi, To Woh Natkhatpan Yaad Aa Gaya.

Song: Haaye Badaa Natkhat Hai Bada Shaitaan (Shraddhanjali)

Ek Baat Aur Kahoon? Is Geet Ko Maine Kishore-Da Ke Bete Amit Ke Saath Milkar Gaaya Tha. Kitni Ajeeb Baat Hai Na, Ek Taraf Mera Beta Sangeet De Raha Hai Aur Doosri Taraf Main Kishore-Da Ke Bete Ke Saath Woh Geet Gaa Rahi Hoon.

The Song "Haaye Badaa Natkhat Hai Bada Shaitaan" Continues.

Bete Ke Saath Saath Mujhe Mere Bhai Ka Bachpan Bhi Yaad Aa Raha Hai. Usey Main Apne Bete Se Bhi Zyaada Pyar Karti Hoon. Jee Haan, Hridaynath, Jo Aajkal Aapke Liye Pyari Pyari Dhune Bana Raha Hai. Jab Woh Chhota Tha Main Usey Apni Godi Mein Taange Rehti Aur Woh Meri Baal Kheenchta. Kabhi Maa Se Jaakar Kehta Ki 'Isey Aur Maar, Aur Maar' (Laughs). To Leejiye Hridaynath Ke Sangeet Nirdeshan Mein Suniye Film Dhanwaan Ka Geet Jisey Lata Didi Aur Suresh Wadekar Ne Gaaya Hai. Uresh Ke Baare Mein Main Kehna Chaahoongi Ki Woh 8 Saal Ki Umra Se 'Classical' Seekh Raha Hai Aur Uski Aawaaz Mein Wohi Baat Hai Jo Kisi Bhi 'Classical' Seekhe Huye Kalakaar Ke Gale Mein Hoti Hai. Mujhe Asha Hai Ki Woh Naam Karega.

Song: Yeh Aankhen Dekhkar Hum Saari Duniya Bhool Jaate Hain (Dhanwaan)

Ab Jo Gaana Main Aapko Sunwaane Jaa Rahi Hoon Woh Marathi Mein Hai, Jo Ki Meri Maatribhaasha Hai. Aap Shaayad Is Geet Ka Arth Na Samajh Paayen Lekin Iski Mithaas Mein Zaroor Kho Jaayenge. Yeh Ek Premgeet Hai. Yun To Mujhe Mere Gaaye Huye Gaane Pasand Naheen Aate, Lekin Yeh Geet Mujhe Pasand Hai. Isey Mere Chhote Bhai Ne Bahut Achchha Sangeet Diya Hai Aur Shaayad Maine Gaaya Bhi Achchha Hai, Zara Suniye To...

Song: Karuna Aali Raatra Azuna (Marathi Song)

Fauji Bhaaiyon, Hum Logon Ko Filmi Gaanegaate Huye Bahut Lamba Arsa Ho Gaya Hai, Isliye Aajkal Filmi Geet Gaane Mein Zyaada Mushkil Naheen Hoti. Lekin Is Film Ne Mujhe Sochne Par Majboor Kar Diya Tha. Umraojaan Ke Liye Jab Khayyam Saahab Mere Ghar Aaye Aur Kaha Ki Yeh 'Picture' Ek 100 Saal Puraani Kahani Par Aadharit Hai To Aine Unse Kaha Ki Aap Mujhe Woh Kitaab De Deejiye. Maine Kitaab Padhee Aur Apni Aawaaz Ka 'Tone' Alag Kiya, Taane Aur Harkat Ko Kaabu Mein Rakhne Ki Koshish Kee. Aap Ne Dekhaa Hoga Ki Maine Umraojaan Ke Geeton Mein Taane Naheen Lee Hain. Log Mujhse Poochte Ki Aisa Kyun Kiya? Khayyam Saahab Ne Bhi Logon Se Kaha Ki Yeh Gaane Shaayrana Hai, Inmein Taane Zaroori Naheen Hai. Isi 'Picture' Ka Ek Gaana Suniye "Dil Cheez Kya Hai Aap Meri Jaan Leejiye"

Song: Dil Cheez Kya Hai Aap Meri Jaan Leejiye (Umraojaan)

Ab Main Aapko Ek Aisi Aawaaz Sunwaayungi Jo Ek Sangeetkaar Bhi Hain Aur Jinhe Nayee Nayee Cheezen Laane Ki Koshish Rehti Hai Aur Mujhe Bhi Naye Naye Tarah Ke Geet Gaane Ka Shauk Hai. Aapko Yaad Hoga Teesri Manzil Film Mein Ek Gaana Tha "Aaj Aaja Main Hoon Pyar Tera". Yeh Gaana Badaa Mushkil Tha, Pet Ko Dabaana Padta Tha. Ek Baar Main Apni Gaadi Mein Jaate Waqt " A Aa Aaja A Aa Aaja" 'Practise' Kar Rahi Thi To Mera 'Driver' Samjha Ki Meri Tabeeyat Kharaab Ho Rahi Hai. Usne Mujhse Poochha Ki 'Kya Baat Hai Didi?'. Maine Kahaa 'Kuchh Naheen , Chal Gaadi Chalaa'.

Song: Aaja Aaja Main Hoon Pyar Tera (Teesri Manzil)

Arey Dekhiye Main Unka Naam Kehna To Bhool Hi Gayi, Yeh Hain R D Burman Saahab.

The Song "Aaja Aaja Main Hoon Pyar Tera" Continues.

Ek Aur Nayee Aawaaz Hai, Jo Hindi Geeton Ke Liye Naya Hai Lekin Tamil Aur Telugu Mein Bahut Geet Gaa Chuke Hain. Main Baat Kar Rahi Hoon Balasubrahmanyam Ki. Bahut Ki Meetha Aur Sureela Gaate Hain. Unka Gaaya Ek Geet Sunwaati Hoon Jismein Unke Saath Ek Chhoti Si Bachchi Rajeshwari Hain. Aisi Laykaari Ek Chhote Bachche Ke Liye Aasaan Kaam Naheen, Lekin Agar Woh Sangeetkaar Laxmikant Ki Beti Hai Phir To Hogi Hi.

Song: Achchha Main Daddy Se Baat Karoonga (Ek Hi Bhool)

Ab Woh Aawaaz Jo Hazaaron Hazaaron Saal Mein Bhagwaan Ek Baar Banaata Hai. Yeh Woh Aawaaz Hai Jise Sun Sun Kar Main Prerana Paati Hoon. Yeh Aawaaz Kabhi Hamko Hansaate Hain, Kabhi Rulaate Hain. 'Recording' Ke Waqt Woh Hamein Itna Hansaate Hain Ki Ham Logon Ko Kehna Padta Hai Ki 'Kishore-Da, Aur Mat Hansaaiye Naheen Gaa Naheen Paayenge'. Jab Mere Bete Hemant Ne Kahaa Ki Woh Kishore-Da Se Apna Gaana Gawaana Chaahta Hai, To Main Dar Gayi Ki Yeh Mera Kal Ka Ladka Kishore-Da Jaise Gaayak Ko Kya Gaana Seekhaayega! Lekin Kishore-Da Ne Ussey Gaana Seekha Aur Gaaya. Yeh Mere Bete Ke Pehle 'Picture' Ka Gaana Tha Jise Kishore-Da Ne Gaaya.

Song: Jeevan Mein Humsafar Milte To Hain Zaroor (Taxi Taxi)

Ab Is Aawaaz Ke Baad Aur Kaun Si Aawaaz Aapko Sunaayun? Aur Itna Waqt Bhi Naheen Ki Kishore-Da Ka Gaaya Koi Aur Geet Sunaayun. Aage Jab Kabhi Phir Mauka Milegaa Main Aapke Liye Haazir Ho Jaayungi. Ab Ijaazat Deejiye, Jai Hind!

THE END

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Asha Bhosle-2
| + - | RTL - LTR