Vishesh Jaimala - Lata Mangeshkar-1

Written by Sujoy Chatterjee
Radio Se
Print

Aaj Ka Yeh Vishesh Jaimala Prastut Karne Jaa Rahi Hain Swar Samragyi Lata Mangeshkar:

Fauji Bhaiyon Ko Lata Mangeshkar Ka Namashkaar. Peechhle Saalon Mein Maine Kuch Gaane Gaaye Hain Aur Kuchh Gaane Sune Hain. Aaj Jab Mujhe Mere Pasand Ke Kuchh Geeton Ko Sunwaane Ke Kaha Gaya Hai To Main Uljhan Si Mehsoos Kar Rahi Hoon. Maine Kuchh Apne Aur Luch Doosron Ke Geeton Ko Chuna Hai. Agar Aapko Yeh Gaane Pasand Aaye To Main Samjhoongi Ki Mera Prayaas Safal Raha Hai.

Song: Allah Tero Naam Eeshwar Tero Naam

Yeh Bhajan Maine Film Hum Dono Ke Liye Gaaya Tha. Geet Likha Tha Sahir Ludhiyanvi Ne Aur Sangeet Tha Jaidev Ka. Is Bhajan Ko Agar Subah Aur Raat Ke Waqt Suna Jaaye To Ek Ajeeb Si Sukoon Milti Hai.

Swargeeya Shri K.L.Saigal, Waise To Unse Seekhne Ka Saubhaagya Mujhe Praapt Naheen Huya, Magar Unke Gaane Gaane Sun Sun Kar Hi Mujhmein Sugam Sangeet Gaane Ki Ichchha Jaagee, Aur Is Kshetra Mein Main Unhi Ko Apna Guru Maanti Hoon. Mere Pitaa-Ji, Shri Dinanath Mangeshkar, Jo Apne Zamaane Ke Maane Huye Gaayak The, Unko Saigal-Saahab Ki Gaayaki Bahut Pasand Thi, Aur Mujhe Aksar Saigal-Saahab Kaa Koi Geet Sunaane Ko Kehte. Mujhse Logon Ne Aksar Poochha Hai Meri Safalta Ka Raaz, Aur Maine Yahi Kahaa Hai Ki Main Geet Ke Bhaav Ko Samajhne Ki Koshish Karti Hoon Aur Dhun Ko Baar Baar Man Mein Gungunati Hoon Aur Gaate Waqt Dil Se Gaati Hoon. Geet Ke Bhaav Ke Hisaab Se Kabhi Ghataakar Dekhti Hoon, Kabhi Badhaakar. Aur Jab Gaati Hoon Tab Dil Se Gaati Hoon, Sirf Gale Se Naheen.

Ab Main Aapko K L Saigal Sahab Ka Gaaya Ek Geet Sunaati Hoon.

Lata Hums The First 2 Lines Of "Soja Rajkumari".

Song: Soja Rajkumari Soja

Agla Record Manna Dey Ka Hai, Burman Da Ka Sangeet Jo Ahir Bhairav Raag Par Aadhaarit Hai. Shailendra Ne Bol Likhe Hain Aur Film Hai Meri Surat Teri Aankhen.

Song: Poochho Na Kaise Maine Rain Beetaayi

Maine Kai Baar Dekha Hai Ki Kadi Mehnat Se Tayyar Kiya Huya Geet Bhi Kabhi Achchha Nahin Ban Paata Hai, Aur Kabhi Jaldi Jaldi Mein Banaya Huya Geet Bhi Bahut Achchha Ban Jaata Hai. Ek Baar Main Kolhapur Se Lautkar Aayi To Naushad Sahab Ka Tonsils Ka Operation Huya Tha, Woh Kehne Lage Ki Kal Hi Ek Geet Record Karna Hai, Unhone Usi Haalat Mein Dhun Bhi Mujhe Gaakar Sunaya. Film Amar Ka Yeh Geet Mujhe Aaj Bhi Bahut Achchha Lagta Hai:

Song: Jaanewale Se Mulaaqaat Na Hone Paayi

Woh Kahavat Hai Na - Dardeele Geet Zyaada Meethe Lagte Hain, Main To Is Baat Ko Maanti Hoon. Ab Main Aapko Jahaan Ara Film Ka Aisa Hi Ek Meetha Geet Sunwaati Hoon Talat Mehmood Ki Awaaz Mein Jise Likha Hai Rajinder Krishan Ne Aur Dhun Banayi Hai Madan Mohan Ne.

Song: Phir Wohi Shaam Wohi Gham Wohi Tanhayi Hai

Kabhi Khud Pe Kabhi Haalaat Pe Rona Aaya, Baat Nikli To Har Ek Baat Pe Rona Aaya. Film Hum Dono Ka Yeh Geet Rafi Sahab Ki Awaaz Mein. Ghazal Ke Bol Aur Gaane Ka Andaaz Dono Sundar Ban Padaa Hai.

Song: Kabhi Khud Pe Kabhi Haalaat Pe Rona Aaya

Fauji Bhaiyon Ki Seva Mein Agla Geet Pesh Karti Hoon Film Anuradha Se. Shailendra Ka Geet, Pt Ravi Shankar Ne Uttar Pradesh Ke Lok Geet Kajri Par Aadhaarit Iska Sangeet Tayyaar Kiya Hai.

Song: Kaise Din Beete Kaise Beeti Ratiya Piya Jaane Na

Waise Peechhle Kai Varshon Se Hamare Film Sangeet Par Pashchimi Sangeet Ka Prabhaav Raha Hai. Ab Main Aapko Ek Aisa Hi Geet Sunwati Hoon Jise Meri Bahen Asha Ne Sangeetkaar O P Nayyar Ke Liye Fil Mere Sanam Mein Gaaya Hai

Song: Yeh Hai Reshmi Zulfon Ka Andhera

Film Guide Mein Burman Da Ka Gaaya Geet Ab Main Aapko Sunwati Hoon. Aajke Gaayakon Mein Burmanda Ki Awaaz Sabse Alag Hai, Badi Sahej Aur Saralta Se Gaate Hain, Lok Sangeet Ke Prabhaav Se Unke Gaane Aur Bhi Pyaare Lagte Hain.

Song: Wahaan Kaun Hai Tera

Is Karyakram Ko Samaapt Karne Ke Liye K L Saigal Ke Gaaye Is Geet Se Zyaada Upyukt Geet Aur Kya Ho Sakta

Hai

Song: Babul Mora Naihar Chhoot Hi Jaaye

Achchha To Mere Fauji Bhaiyon, Mere Chune Huye Yeh Geet Aapko Pasand Aaye Honge Aisa Ummeed Ke Saath Main Aapse Vida Leti Hoon...

Jai Hind

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Lata Mangeshkar-1
| + - | RTL - LTR