Vishesh Jaimala - Mahendra Kapoor-1

Written by Sujoy Chatterjee
Radio Se
Print

Mere Pyare Fauji Bhaiyon Ko Mahendra Kapoor Ka Namskaar. Hum Sab Is Desh Ke Niwasi Hain, Hum Sabhi Ko Yeh Desh Bahut Pyara Hai. Humein Ispar Maan Hai Aur Hona Bhi Chaahiye Kyunki Poori Duniya Mein Aisa Desh Aur Kahin Naheen Hai. Main Jab Bhi Baahar Yaani Foreign Jaata Hoon, Desh Ki Yaaden Saath Lekar Jaata Hoon, Aur Is Gaane Se Har Programme Shuru Karta Hoon.

Song: Hai Preet Jahaan Ki Reet Sada (Purab Aur Pashchim)

Mujhe Yaad Hai Jab Bhi Main Bangladesh Frontier Areas Mein Jaaya Karta Tha Fauji Bhaiyon Ko Entertain Karne Ke Liye, Wahaan Ke Fauji Bhai Ek Geet Ki Farmaish Zaroor Karte The, Aur Is Geet Ko Gaaye Bagair Muhe Chhodte Naheen The. Aapko Pataa Hai Kaun Sa Geet Hai Yeh? Leejiye Suniye.

Song: Neele Gagan Ke Tale Dharti Ka Pyar Pale (Humraz)

Yeh Gaana To Aap Ne Sun Liya, Lekin Mera Dil Karta Hai Is Geet Ko Aise Gaayun - Neele Gagan Ke Tale Mere Pyare Fauji Bhaiyon Ka Pyar Pale. Ab Zara Natkhati Baat Bhi Kar Len!Ab Jo Geet Main Aapko Sunaane Jaa Raha Hoon, Usey Youngsters Aur College Students Kaafi Pasand Karte Hain. Pehle Ke Zamane Mein Kisi Geet Ki Recording Mein Jaate Samay Mood Banaakar Jaana Padta Tha. Yeh Geet Romantic Mood Ka Hai, Isliye Maine Aapki Bhabhiji Yaani Meri Patni Ko Yaad Mein Rakhkar Gaaya. Mujhe Yakeen Hai Is Geet Ko Sunkar Aap Bhi Apni Patniyon Ko Yaani Meri Bhabhiyon Ko Zaroor Yaad Karenge.

Song: Ankhon Mein Qayamat Ke Kaajal (Kismat)

Yeh Gaana Jo Ab Aap Sunenege, Yeh Mujhe Isliye Bahut Pasand Hai Kyunki Sahir Sahab Ne Bahut Hi Khoobsurti Se Iska Nazm Likha Tha, Mere Khayaal Mein Shaayad Hi Koi Shayar Aisi Soch Soch Sakta Hai. Suniye Film Gumrah Ka Yeh Naghma.

Song: Chalo Ek Baar Phir Se Ajnabi Ban Jaayen Hum Dono (Gumrah)

Ab Shayri Ki Jab Baat Chali Hai, To Ek Aur Shayar Ka Zikr Karna Chaahoonga, Atil Shifai Sahab, Unka Ek Naghma Mujhe Bahut Pasand Hai - Kab Talak Shamma Jali Yaad Naheen, Film Painter Babu.

Song: Kab Talak Shamma Jali Yaad Naheen (Painter Babu)

Ab Yeh Gaana Suniye, Iske Peechhe Bhi Ek Chhoti Si Kahani Hai. Chopra Sahab Ne Muhse Kaha Tha Ki Is Gaane Ka Hero Ek Fauji Hai, Isliye Gaane Ko Poore Josh Ke Saath Gaana Hoga. Pyare Fauji Bhaiyon, Iska Mukhda Bilkul Waisa Hai Jaisa Aap Log Jeete Hain - Na Munh Chhupake Jeeyo Aur Na Sar Jhukake Jeeyo, Ghamon Ka Daud Bhi Aaye To Muskurake Jeeyo"

Song: Na Munh Chhupake Jeeyo (Humraz)

Pyare Bhaiyon, Aap Logon Ne Jitna Hum Sab Kalaakaaron Ko Pyar Diya Hai, Hamesha Hausla Badhaaya Hai, Jaise Ki Hum Sab Ek Hi Parivaar Ke Sadasya Hain. Agar Main Aapki Shukriya Ada Karoon To Kuchh Aise Karoonga...

Song: Dil Hi Dil Mein Le Liya Dil Meherbani Aapki (Mazdoor)

Fauji Bhaiyon, Aap Hi Hamare Desh Ke Sachche Rakshak Hain, Aap Mein Hi Main Bhagwaan Shri Krishna Ka Roop Dekhta Hoon Jo Saare Adharmon Ka Naash Karte Hain. Geeta Mein Jo Updesh Diya Gaya Hai Aap Usi Ka Anukaran Kar Rahe Hain.

Yada Yada Hi Dharmasya Glaanirbhavati Bharata,

Abhyutthaanam Adharmasya Tadaatmaanam Srijaamyaham.

Paritraanay Saadhunam Vinaashayacha Dushkritaam,

Dharma Sansthapanaarthay Sambhavaami Yuge Yuge,

Sambhavaami Yuge Yuge,

Sambhavaami Yuge Yuge.

Ab Waqt Aa Gaya Hai Jai Hind Kehne Ka, Fauji Bhaiyon, Humein Aap Par Garv Hain. Aap Hain Tabhi Hum Sab Chain Ki Neend Sote Hain. Hum Sab Deshvaasi Aapko Duyaayen Dete Hain, Aur Aap Is Desh Ke Liye Apne Praanon Tak Ki Qurbaani De Dete Hain. Dhanya Hain Aap Aur Dhanya Hai Mera Desh, Jai Hind.

Song: Mere Desh Ki Dharti (Upkaar)

THE END

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Mahendra Kapoor-1
| + - | RTL - LTR