Vishesh Jaimala - Mahendra Kapoor-2

Written by Sujoy Chatterjee
Radio Se
Print

Pyaare Fauji Bhaaiyon Ko Mahendra Kapoor Ka Namashkaar! Pyaare Bhaaiyon, Aap Log To Mujhse Zyaada Samajhte Honge Ki Yeh Jo Hamaara Desh Hai, Is Desh Ne Jo Itna Badaa Naam Kiya Hai, Wo Sirf Apne Vyavhaar Se Kiya Hai, Ki Hamesha Preet Rakhiye Sab Ke Saath. Sabko Ek Jasa Samjhaa Hai, Sab Ko Ek Jaisa Maanaa Hai. Ham Logon Ne Kisi Ke Saath Koi Nafrat Naheen Kee, Kisi Ko Nafrat Se Naheen Dekhaa, Sab Se Hamesha Pyaar Kiya Hai. To Aaj Sab Se Pehle Main Yeh Geet Pesh Karoongaa.

Song: Hai Preet Jahaan Ki Reet (Purab Aur Pashchim)

Pyaare Bhaaiyon, Kai Baar Ham Logon Ko Poochha Jaata Hai, Ki Aap Desh Bhakti Ke Bhi Geet Gaate Hain, Pyaare Waale Geet Bhi Gaate Hain, 'Romantic' Geet Bhi Gaate Hain, Ye Sab Kaise Hota Hai? Ab Dekhiye Na, 'Singer' Ko Hamesha Har Tarah Ka Gaanaa Gaanaa Padta Hai, Har Tarah Ki 'Situation' Samajhni Padti Hai. Jaise Ki Pehle Maine Jo Aapko Woh Geet Sunvaayaa, Woh Desh Bhakti Ka Tha, Waise Hi Ek Aur Geet Hai Mera Jo Kaafi 'Popular' Huya, Aap Logon Ne Bahut Pasand Kiya, Main Chaahoonga Ki Main Aapko Woh Sunvaayun, Kuchh Dil Ki Baaten Hain Jo Main Pesh Karoonga.

Song: Dil Ki Yeh Aarzoo Thi Koi (Nikaah)

Pyaare Bhaaiyon, Yeh Jo Gaanaa Main Aapko Sunaane Jaa Raha Hoon, Yeh Gaana Mujhe Khaas Bahut Pasand Hai, Isliye Pasand Hai Ki Ek To Likha Bahut Achchha Hai, Aur Iska Jo 'Rhythm' Hai, Woh Badaa Khaas Hai. Aur Woh 'Rhythm' Nayyar Saahab Ne Hameshaa Khoobsoorti Ke Saath 'Use' Kiya Hai, Istemaal Kiya Hai. Leejiye Suniye.

Song: Aankhon Mein Qayaamat Ke Kaajal (Kismat)

Aap Ne Mere Kai 'Title Songs' Sune Honge, Jaise Dhund Mein Maine Gaayaa Tha "Sansaar Ki Har Shay Kaa Itna Hi Fasaana Hai", Aise Hi Upkaar Ke Liye Gaaya Tha "Mere Desh Ki Dharti", Isi Tarah Maine Aaj Ki Aawaaz Film Ke Liye Ek 'Title Song' Gaaya Hai, Lekin Jab Main Yeh Gaanaa Gaane Lagaa, Mujhe Cjopra Saahab Ne, Jo Hamaare 'Director' The Ravi Chopra Ji, Unhone Iski 'Situation' Samjhaayi, Aaj Ki Aawaaz Ki, To Pataa Naheen Kyon Mere Dil Mein Ek Ajeeb Si 'Feeling' Aayi, Ki Yeh Ek Nayi Kism Ka Gaana Hai, Leejiye Suniye.

Song: Aaj Ki Aawaaz Jaag Ae Insaan (Aaj Ki Aawaaz)

Bhaaiyon, Hansne Khelne Ka Kisko Shauk Naheen Hotaa! Ek Hamaare Beech Bahut Bade 'Director' Hain Dada Kondke Ji, Unki Maine Bahut Saare Marathi Gaane Bhi Gaaye Hain, Aur Sabse Pehle Jo Unhone Hindi 'Picture' Banaayi, Wo Bhi Gaane Gaaye. Lekin Uske Alaawaa Wo Itne Khushmizaaj Hain Ki Hansaate Hi Rehte Hain, Aur Wo Usi Mein Itna 'Mood' Banaa Dete Hain 'Artiste' Ka Ki Wo 'Situation' Sunaate Hain, Phir 'Jokes' Sunaate Hain, Aur Uske Saath 'Artiste' Ka 'Mood', Aisa Lagta Hai Ki Yeh Kaise Itne Khushi Se Maine Is Gaane Ko Gaa Diya. Kaise 'Mood' Mein Gaa Diya. Aap Nw Bhi Sunaa Hogaa Yeh Gaanaa.

Song: Ganga Tohre Ghaat Mein Aaya Gangaram (Tere Mere Beech Mein)

Bhaaiyon, Yeh Jo Gaana Maine Chunaa Hai, Yeh Isliye Maine Chuna Hai Kyonki Ismein Apna Pyaar Main Aap Sab Ke Liye Zaahir Karna Chaahta Hoon, Ki "Mera Pyaar Woh Hai Ki Mar Kar Bhi Tujhko Judaa Apni Baahon Se Hone Na Degaa".

Song: Mera Pyaar Woh Hai (Yeh Raat Phir Na Aayegi)

Bhaaiyon, Ek Baat Mujhe Yaad Aa Gayi. Main NEFA Border Pe Tha, Aur Apne Saathiyon Ke Saath Aapko 'Entertain' Karne Gaye The. Apne Fauji Bhaaiyon Ko. Wahaan Kuchh Din Ham Log Rahe, To Aapas Mein Itna Pyaar Ho Gaya Ki Jab Ham Log Waapas Aane Lage To Na Hamaara Dil Kare Wahaan Se Jaane Ka Na Fauji Bhaaiyon Ka Dil Kare Ki Ye Sab Log Jaayen. Lekin Jaana To Tha. To Pataa Hai Kya Huya? Ham Log Jaise Hi Motar Mein Baithe, To Ek Fauji Bhaai Aage Badhkar Mujhe Kehta Hai, (Sings) "Abhi Na Jaao Chhod Kar Ke Dil Abhi Bharaa Naheen". Mere Bhi Dil Mein Aisi Hi Khwaahish Uthi Ki Main Bhi Ek Aisa Gaana Gaayun Jo Dil Ke Baare Mein Ho Yaa Koi Bhi Aisa Gaana Ho Jo Mere Fauji Bhaai Gungunaa Sake. To Aisa Hi Ek Gaana Maine Gaayaa Hai, Leejiye Suniye, Mujhe Pataa Hai Ki Aap Ise Zaroor Pasand Karenge.

Song: Dil Hi Dil Mein Le Liya Dil (Mazdoor)

Bhaaiyon, Pataa Naheen Aapko Mere Bachpan Ka Pataa Hai Ki Naheen! Lekin Main Aapko Bataana Chaahta Hoon Ki Main Bachpan Se Hi Rafi Saahab Ka Bahut Badaa 'Fan' Raha Tha Aur Hoon. Unse Maine Bahut Sabak Liya. Ek Sabak Unhone Mujhe Diya Tha Jo Mujhe Ab Tak Yaad Hai, Aur Hamesha Yaad Rahegaa Apne Kaam Ke Baare Mein. Unhone Kahaa Tha Ki Jis Kism Ka Gaana Ho, Use Is Tarah Pesh Karna Chaahiye Ki Jaise Jo 'Situation' Hai, Waisa Hi Tumhaare Saath, Tum 'Feel' Karo Ki Woh Aap Ke Saath Beet Rahi Hai. To Yeh Gaana Jo Main Pesh Kar Raha Hoon Yeh Film Hum Do Hamaare Do Ka Hai, Jismein Ravi Ji Ne Ek Bade Naye Andaaz Ke Saath Iski Yeh Dhun Banaayi Hai, Aur Ismein 'Rhythm' Ka Istemaal Kiya Hi Naheen Hai. Dekhiye, Suniye.

Song: Meri Suniye Zaraa Maine Pee To Naheen (Hum Do Hamare Do)

Bhaaiyon, Is Kaaryakram Ka Samay Samaapt Ho Raha Hai, Isliye Pyaare Bhaaiyon, Yeh Gaana Jo Main Pesh Karoonga, Yeh Qatil Saahab Ka Hai Likha Huya, Aur Lata Ji Ke Saath Isko Maine Gaaya Hai.

Song: Kab Talak Shamma Jali Yaad Naheen (Painter Babu)

Pyaare Fauji Bhaaiyon, Aap Se Vidaa Lene Ka Waqt Aa Gaya. Lekin Is Ummeed Se Ki Phir Mulaaqaat Hogi, Alvidaa Naheen Kahoongaa.

THE END

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Mahendra Kapoor-2
| + - | RTL - LTR