Vishesh Jaimala - Suman Kalyanpur-1

Written by Sujoy Chatterjee
Radio Se
Print

Pyare Fauji Bhaiyon, Namaskaar, Kai Barson Ke Baad Aaj Aapse Phir Baaten Karne Ka Mauka Paakar Mujhe Behad Khushi Ho Rahi Hai. Aap Apne Praanon Ki Aahuti Dekar Bhi Hamare Aan Baan Ki Raksha Karte Hain. Lekin Aap Yeh Mat Sochiye Ki Hum Aapke Baare Mein Naheen Sochte. Hum Apne Geeton Ke Zariye Hamesha Aapke Paas Rehte Hain Chaahe Aap Jahaan Bhi Hon. Apni Kala Ke Zariye Hum Aapke Aas Paas Hi Rehte Hain, Aap Yakeen Karen Na Karen...

Song: Sunaayi De Ya Na De Tumko Tumhe Awaaz Dete Hain.

Fauji Bhaiyon, Mujhe Bachpan Se Hi Gaane Ka Shauk Tha, Mere Maata Pita Ko Bhi Gaane Ka Shauk Tha. Main Us Samay School Mein Thee Jab Noorjehan Aur Lata Didi Ke Gaane Mujhe Aakarshit Karti Thee. Jo Gaane Mujhe Aakrshit Karti Thee Woh Saare Ek Se Badhkar Ek Hain. Unmein Se Ek Suniye Jise Lata Didi Ne Gaaya Hai.

Song: Preetam Meri Duniya Mein Do Din To Rahe Hote (Ada)

Yeh To Satya Hai Ki Dukh Mein Koi Gaa Naheen Sakta, Par Yeh Meethe Geet Aise Samay Bahut Sukoon Pahunchate Hain. Aise Hi Udaasi Ke Din Main Apni Saheli Sharda Balse Ke Saath Apne Ghar Ke Chhat Mein Baithkar Saath Saath Gaati Kuch Dard Bhare Geet. Unmein Se Kuch Main Aapko Gaakar Sunaati Hoon. Pehla Geet Hai Noorjehan Ka "Sakhi Ri Naheen Aaye Sajanwa Mor". Agla Geet Suniye Lata Didi Ka Gaaya Huya "Na Ummeed Hoke Bhi Duniya Mein Jeeye Jaate Hain", Ek Aur Lata Didi Ka Gaana Suniye "Jo Mujhe Bhulake Chale Gaye Unki Yaad Mujhe Sataaye Kyun?". Ab Main Aapko Sunaati Hoon Ek Geet Jo Mujhe Bachpan Se Bahut Bahut Pasand Hai.

Song: Kat Te Hain Dukh Mein Din (Parchhain)

Mujhe Yaad Hai Lata Didi Ek Din Hamare Pados Mein Aaayi Theen. Main Us Samay School Mein Thee. Main Idhar Se Udhar, Udhar Se Idhar Jaa Rahi Thee Ki Unse Miloon Aur Unse Baat Karoon. Par Milna To Door Unhe Main Dekh Bhi Naheen Paayi. 1953 Mein Jab Main Art School Mein Thee, To Mujhe Film Mein Gaane Ka Mauka Mila, Par Woh Film Naheen Bani. Phir Uske Kuch Din Baad, Mujhe Ek Marathi Film Mein Gaane Ka Mauka Mila, Lekin Ek Baar Phir Film Na Ban Paayi. Uske Baad Shekh Mukhtar Ki Film Mangu Mein Mujhe Gaane Ka Mauka Mila. Recording Ke Samay Meri Khushi Ka Thgikana Naheen Raha Kyun Ki Studio Mein Lata Didi Aayi Huyi Theen. Unhone Mujhse Baat Kee Aur Bahut Der Tak Muhse Baaten Kee Bilkul Sagee Bahen Ki Tarah. Phir Uske Baad Maine Kai Sangeetkaaron Ke Liye Gaane Gaaye. Ab Main Aapko Ek Geet Sunaati Hoon Jise Maine Kalyanji Anandji Ke Liye Gaaya Tha Aur Jo Kaafi Lokpriya Huya Tha.

Song: Man Mera Tujhko Maange (Paras)

Har Sangeetkaar Ki Apni Visheshtayen Hoti Hai, Apna Alag Andaaz Hota Hai. Madan Mohan, Naushad, Nashad, Shankar Jaikishen, Burman Dada, Usha Khanna, Roshan Sahab, Is Sabke Liye Maine Gaaye Hain.  Roshan Ji Ke Saath Kaam Karne Mein Ek Alag Hi Anand Hai. Woh Bahut Hansaate The. Alag Kuch Change Bhi Karna Hota To Hansi Hansi Mein Samjhaate The Jisse Ki Gayak Ko Zara Bhi Bura Na Lage. Woh Bahut Hi Guni The, Suniye Unhi Ka Ek Geet Jise Maine Gaaya Tha.

Song: Sharabi Sharabi Yeh Sawan Ka Mausam

Khayyam Sahab Ki Rachnaayon Ko Gaane Mein Bhi Badaa Mazaa Aata Hai. Geet Ki Har Baarikiyaan Woh Khud Gaakar Samjhaate Hain. Film Shagun Ke Ek Geet Ke Recording Ke Din Mujhe Bahut Zukaam Tha, Haal Bahut Hi Bura Tha. Lekin Us Din Recording Karna Bhi Zaroori Tha. Geet Usi Din Record Huya, Kaisa Ban Padaa Hai Aap Khud Hi Suniye.

Song: Zindegi Zulm Sahi (Shagun)

Kai Mauke Aise Aate Hain Jinmein Hansi Aa Jaati Hai. Koi Kehta Hai Ki Gaane Mein "Yeh" Aana Chhahiye, Haath Se Bataate Hain Ki "Yun" Kar Do, Ab Aap Hi Bataiye Ki "Yeh" Aur "Yun" Se Bhala Kisi Geet Ke Baare Mein Main Kya Samjhoon? Sangeetkaar Shankar Sahab Ki Yeh Khoobi Thee Ki We Gayakon Ke Sujhaav Bhi Sunte The. Unhi Ke Liye Maine Ek Geet Gaaya Tha Film Resham Ki Dori Mein Jo Bahut Hit Huya Tha, Suniye Woh Geet.

Song: Behena Ne Bhai Ki Kalayee Pe (Resham Ki Dori)

Ek Aur Sangeetkaar Ka Naam Main Lena Chahti Hoon, Woh Hain Shyam Sharma, Jo Bahut Hi Meetha Dhune Banate The, Khud Ek Achchha Gayak Bhi The, Aur Bahut Meetha Bolte The. Unke Liye Maine Kai Gair Filmi Gaane Gaaye Jaise "Hai Nandlala Tera Man Hai Kaala", "Kitni Baar Main Tum Tak Aayi". Yeh Rachnaayen Aapne Radio Par Suna Hoga. Shyamji Ki Ek Lori Main Aapko Sunati Hoon.

Song: Palak Hindole Kahe Re Nindiya (Dak Bangla)

Fauji Bhaiyon, Dekhiye Na Samay Kaise Nikal Gaya Pataa Hi Naheen Chala, Phir Kabhi Mauka Mila To Zaroor Aapse Baaten Karoongi, Mujhe Bahut Khushi Hogi. Ab Suman Kalyanpur Ko Aagya Deejiye, Namaskaar, Jai Hind!!!

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Suman Kalyanpur-1
| + - | RTL - LTR