Vishesh Jaimala - Suman Kalyanpur-2

Written by Sujoy Chatterjee
Radio Se
Print

Faujiy Bhaaiyon, Namaskaar! Aaj Main Aap Ke Manoranjan Ke Liye Kuchh Filmi Geeton Ki Jaimaala Laayi Hoon. In Geeton Mein Meri Pasand Kam, Aur Aapki Pasand Zyaada Hai. Aur Hona Bhi Chaahiye, Yeh 'Programme' Aap Ka Jo Hai! Mera To Keval Naam Hai. Geet Shuru Karne Se Pehle Main Ek Aap Ko Ek Baat Bataa Dena Aavashyak Samajhti Hoon, Main Paarshwagaayika Avashya Hoon, Parantu Mera Vyavsaay Sangeet Naheen Hai. Sangeet Meri Aastha Hai Aur Geet Meri Aaraadhanaa Hai. Naad Shaastra Mein Bhagwaan Ne Kahaa Hai "Naaham Vasaami Baithunthe, Yoginaam Hridaye Na Cha, Madbhakta Yatra Gaayanti, Tatra Tishthaami Naarada" To Leejiye Sabse Pehle Film Jagat Ki Sabse Prasiddha Paarshwagaayika Lata Mangeshkar Ka Gaaya Geet Suniye, Film Hai Sati Savitri, Shabdkaar Hain Bharat Vyas, Aur Sangeetkaar Laxmikant Pyarelal.

Song: Jeevan Dor Tumhi Sang Baandhee (Sati Savitri)

Aur Ab Suniye Yeh Geet, Isey Film Janwar Ke 'Hero' Shammi Kapoor Ne Apne, Mera Matlab Hai Film Ki 'Heroine' Rajeshree Ko Kuchh Sawaal 'Tape' Karke Bheje. Aur Rajashree Ka Jawaab Kya Tha, Yeh Shankar Jaikishan-Ji Ne Meri Aawaaz Mein Sangeetbaddha Kiya. Is Jawaab Ko Likha Hasrat Jaipuri Ne. Sawaal Kya Hai Jawaab Sunkar Mehsoos Keejiye.

Song: Mere Sang Gaa Gungunaa (Janwar)

Main Ab Jo Yugalgaan Aapki Sevaa Mein Prastut Kar Rahi Hoon, Woh Film Saanjh Aur Savera Ka Hai. Aap To Jaan Hi Gaye Honge Yeh Kaun Sa Geet Hai. Jee Haan, Wohi Hai, Jise Maine Aur Rafi Saahab Ne Gaaya Hai. Main Khaaskar Isliye Aapko Sunwa Rahi Hoon Ke Aajkal Main Jahaan Bhi 'Programme' Mein Jaati Hoon, Log Isi Gaane Ki Farmaaish Baar Baar Karte Hain. Shhastriya Sangeet Ke Aadhaar Par Thumri Ka Ang Dekar Shankar Jaikishan-Ji Ne Sangeetbaddha Kiya Aur Bol Hain Hasrat Jaipuri Ke.

Song: Ajhun Na Aaye Baalma Saawan Beeta Jaaye (Saanjh Aur Savera)

Film Do Bhai Ka Ek Geet Suniye Geeta Dutt Ki Aawaaz Mein, Tarz S D Burman Ki. Is Geet Mein Mujhe Geeta-Ji Ki Aawaaz Mein Rachee Basee Saari Sundarta Dikhaaee Deti Hai. Aur Apna Bachpan Bhi Is Geet Mein Jhaank Leti Hoon. Jee Haan, Mere Bachpan Ka Saathi Hai Yeh Geet. Aap Bhi Suniye...

Song: Mera Sundar Sapnaa Beet Gaya (Do Bhai)

Fauji Bhaaiyon, Ab Ek Bilkul Naye Sangeetkaar Ki Rachnaa Suniye. Inka Naam Hai Jani Babu Qawwal. Qawwaali Ki Duniya Mein Aap Ne Inka Naam Bahut Suna Hoga, Lekin Sangeet Nirdeshakon Ki 'List' Mein Yeh Pehli Baar Aaye Hain. Jani Babu Ne Achchhi Koshish Kee Hai, Aur Achchhi Bandish Dee Hai. Film Hai Noormahal, Shabd Rachnaa Hai Saba Afghani Ki, Aur Gaanewaali Hain, (Smiles), Ab Main Apna Hi Naam Kaise Bataayun!

Song: Mere Mehboob Na Jaa Aaj Ki Raat Na Jaa (Noormahal)

Logon Ka Kehna Hai Ki Ladkiyaan Nahkhreeli Hoti Hain, Zara Si Baat Par Rooth Jaati Hain Aur Khushaamad Karwaati Hain. Lekin Janaab, Main To Samajhti Hoon Mardon Ka Bhi Roothne Mein Jawaab Naheen. Bechaare Naagin Si Balkhaane Lagte Hain. Is Geet Mein Bilkul Aise Hi Ek Saahab Ko Manaaya Jaa Raha Hai.

Song: Roothe Ho Sanam To Phir Kya Hai (

Kuchh Premee Aise Bhi Hain Jo Bandhano Ko Todkar Aage Naheen Badhte. Woh Virah Aur Milan Ke Bhedbhaav Se Oonche Hote Hain. Aise Dil Ki Pukaar Talat Mahmood Ke Swar Mein Prastut Hai Jise Rajendra Krishan Ne Dekh Kabira Roya Film Ke Liye Likhaa Aur Sangeet Se Sajaaya Madan Mohan-Ji Ne.

Song: Hamse Aaya Na Gaya Tumse Bulaaya Na Gaya (Dekh Kabira Roya)

Mera Gaaya Huya Ek Geet Film Lal Bangla Ka Hai. Dhun Banaaee Hai Usha Khanna Ne Aur Lekhak Hain Gulshan Bawra. Pichhle Saal Bambai Mein Paani Ki Kamee Thi. Log Shahar Chhodkar Jaane Ki Tayyaari Mein The. Isi Samay Meri Ek Maraathi Geet Ki 'Recording' Aa Gayi. Bol The "Jhim Jhim Jharati Shraavana Dhaaraa". Maine Bhare Huye Man Se Yeh Geet Gaaya, Aur 'Recording' Samaapt Bhi Na Hone Paayi Ki Paani Barasne Lagaa. Logon Ne Mujhe Badhaai Dee, 'Aap Ne Aise Gaana Gaaya Ki Paani Barasne Lagaa', Hazaaron Aadmi Bambai Chhodkar Jaane Se Bach Gaye. Khair, Woh To Honewaali Baat Thi, Magar Geet Aap Bhi Sun Leejiye.

Song: Jhim Jhim Jharati Shraavana Dhaaraa (Marathi Song)

Ab Main Aapko Manna-Ji Ka Gaaya Film Basant Bahar Ka Geet Sunwaati Hoon. Shabdkaar Hain Shailendra Aur Sangeetbaddha Kiya Hai Shankar Jaikishan Ne. Bol Hain (Sings) "Sur Na Saje Kya Gaayun Main, Sur Ke Bina Jeevan Soonaa..."

Song: Sur Na Saje Kya Gaayun Main (Basant Bahar)

Hamein Yeh Gaana Itna Pasand Hai Ki Ham Apne Ghar Aangan Mein Isey Gungunaaya Karte Hain, Gaaya Karte Hain. Shabdkaar Hain Hasrat Jaipuri, Sangeetkaar Pandit Husnlal Bhagatram, Aur Aawaaz Kiski Hai, Bataa Doon? Jee Naheen, Aap Hi Pehchaaniye...

Song: Ishq Se Aankhen Milee (Sher Afghan)

Dard Ke Woh Pal Kaate Naheen Kat-Te, Jab Koi Aisa Bhi Naheen Hota Ki Usey Dil Ka Haal Bataakar Kuchh Jee Halka Kiya Jaa Sake. Aur Na Koi Aisi Raah Soojhti Hai Jo Manzil Ki Taraf Le Jaaye.

Song: Bujhaa Deeye Hain Khud Apne Haathon (Shagun)

Fauji Bhaaiyon, Meri To Ichchha Thi Ki Aap Logon Ka Main Isi Tarah Manoranjan Karti Rahoon. Parantu Samay Ke Pankh Kahin Se Kahin Pahuncha Dete Hain. Dekhiye Na, Samay Ho Gaya. Aagya Deejiye, Jai Hind!

The End

Share

Translate Page

English French German Hindi Italian Portuguese Russian Spanish Urdu
You are here:   HomeFeaturesRadio SeVishesh Jaimala - Suman Kalyanpur-2
| + - | RTL - LTR